Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.
О Звездо Незаходимая Мати,/ ко спасению нас путеводящая,/ и за ны деннонощно предстательствующая,/ Моли за Церковь Православную,/ Кровию Сына Твоего искупленную,/ да не оскудеет истинными пастырями/ и добрыми делателями,/ не имамы бо иныя помощи разве Тебе, Владычице.
О Дево Благодатная,/ Архангелом с Небес Обрадованная!/ Главизно нашего спасения,/ Начало нашего исправления,/ имущая ко Господу непостыдное дерзновение./ Церковь и Отечество наше в мире сохрани,/ от враг видимых и невидимых нас защити,/ не имамы бо иныя помощи разве Тебе, Владычице.
Слава: Благословен Плод чрева Твоего, О, Дево, Благословенная,/ Емуже
покланяются Ангельский собор и человеческий род, О, Голубице Богоизбранная./ Путь наш, к Богу ведущи,/ покаянием истинным укрепи,/ зрением греха и исповеданием его направи,/ не имамы бо иныя помощи разве Тебе, Владычице.
И ныне: Госпоже Богородице, наше к Богу твердое упование!/ Ты еси Источник чудес и веры Истинныя Утверждение,/ храмов наших Украшение и душ Радование./ Буди нам иконою Твоею защитою от козней вражиих/ и залогом спасения душ наших,/ не имамы бо иныя помощи разве Тебе, Владычице.