Иерей: Вонмем, премудрость. Прокимен, глас 6: Помяну имя Твое во всяком роде и роде
Хор: Помяну имя Твое во всяком роде и роде
Иерей: Слыши, Дщи, и виждь, и приклони ухо Твое.
Хор: Помяну имя Твое во всяком роде и роде
Иерей: Помяну имя Твое
Хор: во всяком роде и роде
Иерей: Премудрость, прости. Услышим святаго Евангелия. Мир всем.
Хор: И духови твоему.
Иерей: От (имя рек) святаго Евангелия чтение.
Хор: Слава Тебе, Господи, слава Тебе.
Иерей: Вонмем!
По прочтении же:
Хор: Слава Тебе, Господи, слава Тебе.
Пресвятая Богородице, спаси нас!
Кондак, гл. 6
Не имамы иныя помощи, / не имамы иныя надежды, / разве Тебе, Владычице. / Ты нам помози, / на Тебе надеемся / и Тобою хвалимся, // Твои бо есмы раби, да не постыдимся.
Ектения
Иерей: Помилуй нас, Боже, по велицей милости Твоей, молим Ти ся, услыши и помилуй.
Хор: Господи, помилуй (трижды).
Иерей: Еще молимся о Великом Господине и отце нашем Святейшем Патриархе Кирилле и о Господине нашем Высокопреосвященнейшем Митрополите Варсонофии и о всей во Христе братии нашей.
|
|
Хор: Господи, помилуй (трижды).
Иерей: Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Хор: Господи, помилуй (трижды).
Иерей: Призри, Человеколюбче, милостивым Твоим оком на рабы Твоя, ко Твоему благоутробию верою припадающия, и услышав моления их, благое намерение и дело их благослови, и благополучно начати и спешно кроме всякаго препятия во славу Твою совершити, яко Всесильному Царю молим Ти ся, услыши и помилуй.
Хор: Господи, помилуй (трижды).
Иерей: Еще молимся Господу Богу нашему, да призрит на рабов Своих сих и да ниспослет в сердца, во ум и во уста их духа премудрости, разума же и благочестия, и страха Своего и просветит их светом Своего благоразумия и подаст им силу и крепость к скорому восприятию и спешному научению Божественнаго закона Его, наставлению и всему благому и полезному учению, да преуспевают они премудростию и разумом и всеми благими делами, во славу Пресвятаго Его имени, Церкви и Отечеству на пользу, рцем вси, Господи, услыши и помилуй.
Хор: Господи, помилуй (трижды).
Иерей: Еще молимся о милости, жизни, мире, здравии, спасении, посещении, прощении, и оставлении грехов рабов Божиих (имярек), и о еже умножити им лета жития их.
Хор: Господи, помилуй (трижды)
Иерей: Еще молимся о еже сохранитися граду сему, и святей обители сей, и всякому граду и стране от глада, губительства, труса, потопа, огня, меча, нашествия иноплеменников и междоусобныя брани: о еже милостиву и благоуветливу быти благому и человеколюбивому Богу нашему, отвратити всякий гнев, на ны движимый, и избавити ны от належащаго и праведнаго Своего прещения, и помиловати ны.
|
|
Хор: Господи, помилуй (трижды).
Иерей: Еще молимся за всю братию и за вся христианы.
Хор: Господи, помилуй (трижды).
Иерей: Яко милостив и Человеколюбец Бог еси, и Тебе славу возсылаем, Отцу и Сыну, и Святому Духу, ныне и присно, и во веки веков.
Хор: Аминь.
Молитвы
Иерей: Ко Пресвятой Владычице Деве Богородице помолимся.
Хор: Пресвятая Богородице, спаси нас.
Молитва
Царице моя преблагая, надеждо моя Богородице, приятелище сирых и странных предстaтельнице, скорбящих рaдосте, обидимых покровительнице! Зриши мою беду, зриши мою скорбь, помози ми яко немощну, окорми мя яко стрaнна. Обиду мою веси, разреши ту, яко волиши: яко не имам иныя помощи разве Тебе, ни иныя предстaтельницы, ни благия утешительницы, токмо Тебе, о Богомaти, яко да сохраниши мя и покрыеши во веки веков. Аминь.
Хор: Аминь.
Окончание
Иерей: Премудрость. Пресвятая Богородице, спаси нас.
Хор: Честнейшую Херувим / и славнейшую без сравнения Серафим,/ без истления Бога Слова рождшую,/ сущую Богородицу, Тя величаем.
Иерей: Слава Тебе, Христе Боже, упование наше, слава Тебе.
Хор: Слава Отцу и Сыну, и Святому Духу, и ныне, и присно, и во веки веков. Аминь. Господи, помилуй. (трижды) Благослови.
Священник произносит отпуст.
Хор: Аминь.